የምግብና ጤና ነክ ቁጥጥር ዳሬክቶሬት የህዝብ ጤናን ለመጠበቅ እና የምግብ ደህንነትን ለማረጋገጥ በሚያከናውናቸው የቁጥጥርና ክትትል ስራዎች ላይ ትኩረት ያደረገ የውይይት መድረክ ከቅርንጫፍ ጽህፈት ቤቶች የዘርፉ ዳሬክተሮችና የቡድን መሪዎች ጋር ውይይት አካሂዷል። መድረኩ የተካሄደበት ዋና ዓላማ በተከናወኑ የቁጥጥር ስራዎች ላይ የተገኙ ውጤቶችን በመገምገም፣ የተለዩ ክፍተቶችን መለየት እና በቀጣይ የሚሰሩ የስራ አቅጣጫዎችን በተቀናጀ መልኩ ለመተግበር የጋራ መግባባት መፍጠር መሆኑ ተገልጿል። ለውይይቱ መነሻ በስጋ ቤቶች ላይ የተከናወኑ የቁጥጥር ስራዎች፣ በትምህርት ቤቶች ምገባ ላይ በሀይጅንና ሳኒቴሽን ዙሪያ የተደረጉ ክትትሎች፣ በትንባሆ ምርትና ንግድ ላይ የተካሄዱ የቁጥጥር ስራዎች እንዲሁም በዘይት አምራች ተቋማት ላይ የተሰሩ ስራዎች በዝርዝር ቀርበዋል። በመድረኩ የባለስልጣኑ የቁጥጥር ዘርፍ ምክትል ዋና ስራ አስኪያጅ አቶ እንጋ እርቀታ ተገኝተው ንግግር ሲያደርጉ፣ ተቋሙ በቀጣይ የሚያተኩራቸውን ዋና ዋና የስራ አቅጣጫዎች አስቀምጠዋል። አቶ እንጋ እንደገለጹት፣ ስጋት ተኮር ቁጥጥርን ማጠናከር፣ ተቋማት ራሳቸውን እንዲቆጣጠሩ ማስቻል፣ ድንገተኛ ቁጥጥሮችን አጠናክሮ መቀጠል፣ የግንዛቤ ማስጨበጫ ስልጠናዎችን ማስፋት እና የቅንጅታዊ አሰራርን ማጠናከር የተቋሙ ዋና የቀጣይ አቅጣጫዎች መሆናቸውን ገልጸዋል። በተጨማሪም አዋጅ፣ ደንብና መመሪያዎችን በሚጥሱ እና ለህዝብ ጤና ስጋት በሚያመጡ ተቋማት ላይ ተገቢ እርምጃ መውሰድ የማይታለፍ መሆኑን በንግግራቸው አጽንኦት ሰጥተዋል። ውይይቱ የጋራ መግባባትን በማጠናከር የቁጥጥር ስራዎች በተቀናጀና በውጤታማ መልኩ እንዲፈጽሙ አጋዥ መሆኑ በተሳታፊዎች ተገጿል።