የአዲስ አበባ ከተማ አስተዳደር ምግብና መድኃኒት ባለስልጣን ለ39ኛው የአፍሪካ መሪዎች ጉባኤ ወደ አገራችን ለሚመጡ እንግዶች የሚያገለግሉ ሆቴሎች ላይ ጥብቅ ቁጥጥር እያካሄደ መሆኑን አስታወቀ። ኢትዮጵያ የአፍሪካ ህብረት መቀመጫ እንደመሆኗ በየዓመቱ ከፍተኛ የአፍሪካ እና የዓለም አቀፍ መሪዎችን በመቀበል ረገድ ልዩ ኃላፊነት እንዳለባት ይታወቃል፣ አንደባለስልጣን መስሪያ ቤት ይህ ቁጥጥርም የአገሪቱን መልካም ገጽታ ለማስጠበቅ እንደሚረዳም ተጠቁሟል። ቁጥጥሩ ባለአራትና ባለአምስት ኮከብ ሆቴሎችን ጨምሮ ለጉባኤው የተመረጡ 30 ሆቴሎችን የሚያካትት ሲሆን፣ በተለይም የመኝታ ክፍሎች፣ የምግብ ማብሰያ ቦታዎች እና የአገልግሎት አሰጣጥ ሂደቶች ላይ ትኩረት ተሰጥቶ እየተሰራበት ይገኛል። በቁጥጥሩ ወቅት የሚገኙ ክፍተቶች ከሚመለከታቸው አካላት ጋር በመወያየት የማስተካከያ እርምጃ እየተወሰደ መሆኑን ባለስልጣኑ ገልጿል። በተለይም ሁሉም በከተማችን ያሉ ሆቴሎች በአገራችን ባህልና ወግ መሰረት ለእንግዶች ቅድሚያ ለመስጠት በሚያስችል አግባብ የተሟላ ዝግጅት እንዲያደርጉ ከወትሮ የተለየ ጥብቅ ክትትልና ቁጥጥር እየተደረገ እንደሆነም ተገልጿል ። ቁጥጥሩ ጉባኤው እስኪጠናቀቅ ድረስ የሚቀጥል ሲሆን፣ ዓላማው ሊከሰቱ ከሚችሉ ተላላፊ በሽታዎች እንግዶችን መከላከልና ኢትዮጵያን እንደ የአፍሪካ ዲፕሎማሲ ማዕከል ያላትን ሚና ማጠናከር መሆኑ ተገልጿል።